[7:01 am, 07/02/2024] +91 83176 57125: ముంబయి: ముంబయి ఇండియన్స్‌ కెప్టెన్‌గా రోహిత్‌ శర్మను తప్పించి హార్దిక్‌ పాండ్యకు పగ్గాలు అప్పగించడంపై పెద్ద దుమారం చెలరేగిన సంగతి తెలిసిందే. ఈ విషయంపై రోహిత్‌ ఇప్పటివరకూ మాట్లాడలేదు. కానీ ఇప్పుడు ముంబయి ప్రధాన కోచ్‌ మార్క్‌ బౌచర్‌ స్పందించాడు. రోహిత్‌పై ఒత్తిడిని తగ్గించడానికే కెప్టెన్సీ బాధ్యతలను హార్దిక్‌కు ఇచ్చామని ఓ పోడ్‌కాస్ట్‌లో పేర్కొన్నాడు. ‘‘బ్యాటుతో గత రెండు సీజన్లలో రోహిత్‌ అంత బాగా రాణించలేదు. కానీ కెప్టెన్‌గా బాగానే చేశాడు. రోహిత్‌ చాలా ఏళ్లుగా ముంబయికి నాయకత్వం వహిస్తున్నాడు. ముంబయి, టీమ్‌ఇండియా కెప్టెన్‌గా అతడికి మంచి రికార్డే ఉంది. చాలా తీరిక లేకుండా ఉంటున్నాడు. అందుకే అతడిపై ఒత్తిడి తగ్గించాలనుకున్నాం’’ అని బౌచర్‌ చెప్పాడు. గత రెండు ఐపీఎల్‌ సీజన్లలో రోహిత్‌ 20 సగటు, 126.84 స్ట్రైక్‌రేట్‌తో 600 పరుగులు చేశాడు. ‘‘ఆటగాడిగా అతడు ఇప్పటికీ జట్టులో ఉండాలనుకుంటున్నాం. ఎందుకంటే జట్టుకెంతో విలువను చేకూరుస్తాడు. కెప్టెన్‌ అన్న భారం లేకుండా అతడు బరిలోకి దిగి ఆటను ఆస్వాదించాలని కోరుకుంటున్నాం’’ అని అన్నాడు. కెప్టెన్సీ ఒత్తిడి లేకుండా ఆడితే అతడి నుంచి అత్యుత్తమ ఆట రావొచ్చని భావిస్తున్నామని బౌచర్‌ చెప్పాడు. అయితే కెప్టెన్‌గా రోహిత్‌ను తప్పించడానికి బౌచర్‌ చెప్పిన కారణాలతో రోహిత్‌ శర్మ భార్య రితిక విభేదించడంతో ఈ చర్చ ఆసక్తికరంగా మారింది. ‘‘దీని వల్ల చాలా తప్పులు జరిగాయి’’ అని పోడ్‌కాస్ట్‌ కామెంట్‌ సెక్షన్‌లో ఆమె రాసింది.